政情：田少泛民夾擊 只怪CY唔爭氣
本身係小型地產商、並喺特首選舉中提名前政務司司長唐英年嘅自由黨黨魁田北俊，近日與泛民黨派聯手威逼政府為樓市辣招「減辣」，尋日佢再聯同多名泛民議員同前高官喺電台大合奏，炮轟特首梁振英（CY）。咁啱同樣曾力撐唐唐選特首嘅長實集團主席李嘉誠，最近亦搞作多多，令人質疑本港嘅大小地產商，正在發動新一輪倒梁行動。偏偏CY又唔爭氣，無能力亦無大志解決當前施政困局，難怪有曾經支持過佢嘅人，都對CY政府上場一年多以來嘅表現大嘆失望！
有泛民背景嘅小學女教師林慧思當街爆粗辱警，以及廉政公署經調查後還兩名前行政會議成員張震遠同林奮強清白，對政府嚟講本應係利好消息，偏偏CY日前到天水圍落區評論呢兩單嘢時講大咗，將好事變壞事，期間又爆出懷疑黑幫人士圍毆示威者事件，結果被泛民食住上遊行示威要求佢落台。
與地產商大合唱
尋日田北俊亦高調加入戰團，喺電台連珠炮轟CY，話當前嘅社會分化局面係由CY一手造成，令建制派分裂為「梁營」同「非梁營」，要求對方加強與「非梁營」建制派合作。期間佢更加連國家領導人都玩埋，話領導人喺內地都唔可以「自己鍾意就咁，唔鍾意就咁」，喺香港嘅CY更加唔可以自己想點做就點做喎。
其實早喺新政府去年七月上場開始，田北俊已不斷喺立法會內外對CY單單打打，拒絕同新政府合作，最近佢又同泛民聯手威逼政府為樓市辣招「減辣」，明幫地產商。究竟係CY唔肯同「非梁營」建制派合作，定係一班「唐營」餘孽同地產商拒與CY合作，大家可以自己判斷。
講開地產商，李嘉誠旗下嘅和黃集團早前被傳放售百佳超市業務，引發李嘉誠有意從香港撤資，甚至矛頭直指CY政府嘅揣測。雖然李嘉誠同長和系已公開否認有此企圖，但夾埋田北俊近日嘅種種動作，實在難免惹人聯想。
梁班子屢爆醜聞
不過，如果政府做得好，不論有乜嘢人基於乜嘢動機攪局，都唔會咁易被人玩起，偏偏CY嘅管治班子同幕僚屢爆醜聞，房屋、扶貧等重點施政遲遲未見成效，甚至連簡單落區會見市民，都搞到又有黑社會打人，又要阻住啲居民出入激起民怨，令當初支持過佢嘅人大失所望，哀莫大於心死。