中環出更：唐唐父女樂 超市滿載歸
港府高官最近忙於落區同拆解連串政治炸彈，相反前政務司司長唐英年（唐唐）就無官一身輕，最近不時喺中環一帶出沒，除咗歎咖啡，前日下午又偕女兒去中環ifc間超級市場掃貨，滿載而歸。唔知呢啲係咪就係財爺口中嘅「你有你生活，我有我忙碌」嘅真實寫照呢？
專攻北海道食品
前日下午五時，卓妮見唐唐同女兒閒逛超市，起初二人專攻日本北海道食品，左望右望咗一陣，之後就喺超市入面四圍逛，睇吓有冇其他心水食品。期間唐唐同女兒耐心挑選心頭好，佢女兒更曾半蹲下來左揀右揀，前前後後廿分鐘後就畀錢離開，兩父女一人拎住一袋戰利品，加上佢哋臉上滿足嘅笑容，就知道買嘢買得幾咁開心。
其後唐唐同女兒行入一間護膚品店，但唔似得之前行超市咁有收穫，二人行咗一陣後就離開。當唐唐等候座駕接載離開前，有一對路過嘅年輕男女要求同唐唐合照，唐唐亦有求必應表現和善，隨後先同女兒一同乘座駕離開。
卓妮