中環出更：時尚專業女性 愛拚才會贏

從事服裝設計嘅Dee認為，要做時尚專業女性，除咗要有領導才能、保持對社會時事嘅觸覺，當然唔少得要追上潮流。佢又勉勵女性，並非環境好、讀名牌大學先至有成就，最重要係克服困難，好似佢一向講開英語、上海話同國語，其實好怕講廣東話，但佢都堅持用廣東話分享感受。

做義工助人自助 搵到好歸宿

至於另一獲獎嘅Rendy，佢父母、丈夫王欣浩同妹妹舉家捧場。結咗婚近一年嘅Rendy甜笑話，好感謝老公一直以來嘅支持。Rendy自爆同做醫生嘅丈夫喺十五歲時做義工認識，笑言做義工可以「助人自助」，搵到好姻緣。佢仲透露即將回歸校園，事關佢剛剛報讀咗中文大學工商管理碩士課程，認真好學不倦。

吳嘉汶（右二）同洋服公司主席冼慧詩（左一）同時獲獎，與活動贊助人蔡敏思（右一）及首席評審趙麗娟（左二）分享時尚專業女性心得。

新華旅遊董事總經理楊章桂芝（左）提名伍婉婷（中）參選獲獎，好友菁英會成員李煥明（右）送上祝賀。

芸芸得獎者之中，最特別嘅係創辦咗全女班私家偵探社嘅文顯楠，佢打破咗男性主導私家偵探市場嘅傳統，並善用女性心思細密嘅特質，幫助破碎家庭修補關係，減少社會悲劇發生。佢仲話最初入行每日工作近十八小時，月薪得二、三千元，又要冒性命危險，幾經辛苦至捱到出頭，鼓勵大家勿放棄理想。

卓妮