唔少人細個嗰陣都有寫過「我的志願」，但平等機會委員會主席周一嶽尋日就自爆兒時有好多夢想，包括想做歌唱家、畫家同運動家，但樣樣都半桶水。其實佢依家做咗「炒家」囉，點解？因為佢叫做「周一鑊」，佢成日炒燶嘢孭鑊吖嘛。佢又話，小時候默書次次都捧蛋，又欠交功課，結果畀老師罰抄。點知佢連罰抄都懶得抄，畀老師加倍懲罰，二十句變成八十句，連佢爸爸都忍唔住話要出手抄埋一份。最後「周一鑊」諗到將四支筆綁埋一齊罰抄，抄抄吓仲抄上癮添，真係騎呢之極呀。
