做過食物及衞生局副局長同特首辦主任嘅梁卓偉（Gabriel），自從喺政府熱廚房抽身而退後，可謂樂得逍遙，重返香港大學醫學院後繼續扶搖直上，今個月起仲接替約滿離任嘅李心平，出任新一任醫學院院長。
佢尋日同傳媒茶敍介紹醫學院未來發展時，大家都好有興趣知道佢對近期社會對立、政局混亂有咩睇法，但佢就強調自己不在其位，不謀其政，仲話「最近幾日睇報紙都唔睇嗰幾版（政治新聞）」。
作為歷來最年輕嘅港大醫學院院長，問佢做完五年院長任期後，會否重新加入政府「升呢」做局長？Gabriel就一口否定，話未來五年只會將「百分之二百」嘅心機放喺大學發展，又講笑話自己過去三年轉咗三個崗位（副局長、特首辦主任及港大教授），希望大家今次可以畀佢做耐少少喎。
Gabriel透露，遲吓會搞多場論壇聽聽學生、教職員同校友對醫學院嘅期望，廣集民意，最後仲贈咗大家十二字真言「虛心學習，固本培元，求實創新」，話係每日用嚟自勉嘅目標。其實呢三句話套用番喺今日嘅香港都好適合，唔知現任官員又會唔會從中有所啟發呢？