公共專業聯盟立法會議員梁繼昌（Kenneth）尋日喺社交網站上載咗一張戴黑超嘅自拍照，原來佢唔聲唔聲做咗個視網膜修補手術。
立法會放緊暑假，不過Kenneth趁暑假做眼部手術，唔係特別安排，而係突發嘅。Kenneth話自己係深近視一族，右眼有成七百幾度近視，早前進行定期眼科檢查嘅時候，醫生話佢知視網膜有事，如果情況持續惡化，過多一至兩年就會完全睇唔到嘢。
Kenneth聽到後即時嚇咗一跳，去完倫敦旅行返港後急急腳同醫生約時間做激光手術，手術做咗個幾鐘，麻醉咗進行，所以唔覺痛。佢話未來一至兩日都會戴住副太陽眼鏡返立法會開工，原因係要保護右眼，免受太陽直接照射。Kenneth認為，一定係自己睇得書多，所以眼有事喎。
Kenneth早前同家人去咗倫敦八日，屬自駕遊，遊完返港做手術，佢呢個暑假都幾充實喎。