政情：星爺接棒財會有阻滯
近年泛民事無大小都發動拉布戰，令立法會財務委員會主席呢個位，變得愈嚟愈難做，既要阻止泛民拉布，確保政府提出嘅重要財務建議可如期表決，但如果出手太過狠辣，又可能招致反效果令會議愈拖愈長。去年財委會主席由自由黨張宇人（Tommy）出任，佢中間落墨嘅做法，雖然令建制派唔多喜歡，但泛民就覺得佢相對公道。根據建制派去年達成嘅共識，來年財委會主席應該輪到金融界議員吳亮星（星爺）出任，但最近突然傳來消息，話有人希望Tommy連任，令星爺隨時接棒無望。
吳指若當選必力阻拉布
財委會一向係建制與泛民陣營嘅兵家必爭之地，為咗唔好自己人打自己人，舊年建制派進行協議，最後決定由Tommy同星爺喺四年期內「梅花間竹」、一人做一年主席。不過世事又點會咁理想，最近有消息傳出，有議員密謀叫Tommy添食一年，再等下年先畀番星爺做餘下兩年任期。
至於臨時變陣嘅背後原因，就眾說紛紜喇！有人話Tommy做慣做熟，不如做埋落去，來年要替泛民「剪布」都熟手啲。但亦有人覺得係泛民攪局，明知佢哋就算派出做過多年財委會主席、而且口碑唔錯嘅民主黨劉慧卿（卿姐）競逐財委會主席，始終都係輸硬，倒不如夾埋自由黨五票，支持相對溫和嘅Tommy連任，等泛民可以喺來年財委會繼續「拉布」，唔使畀立場保守嘅星爺迅速「剪布」。
我哋問過兩位當事人，星爺好似好唔在乎咁話，一切隨緣，唔會主動游說其他議員支持自己，但如果有人提名佢做主席，自己亦願意一試，而且一定力阻拉布，強調財委會係負責審批撥款，而唔係畀人不停問問題。
張稱無諗過做兩年主席
至於Tommy本人就講到好唔想連任主席咁，強調自己絕對尊重去年達成嘅共識，無諗過連續做兩年，總之一日有人提名星爺，佢一定唔會同佢對撼，以免分散建制派票源畀泛民「執死雞」。但星爺如果唔出選，Tommy係咪會當仁不讓呢？佢亦話自己無咁嘅打算。不過亦有人質疑，實情可能真係Tommy唔想做，但佢所屬自由黨想佢繼續做落去霸住個位，先至傳出有關消息。
我哋亦問過卿姐今屆會否再戰財委會主席，佢就話暫時仍未決定，仲要考慮一下，至於要考慮啲乜，佢就封口唔講喇！莫非係喺度計緊票睇吓有無機會偷雞？