政情：中環出更：廖秀冬拆解讀寫障礙之謎
離開官場後，加入港大擔任校長資深顧問（可持續發展）嘅前環境、運輸及工務局局長廖秀冬（Sarah），原來一直有讀寫障礙，但Sarah排除萬難苦學成才，經驗多到夠出書。尋日佢就以過來人身份，出席由東華三院同恒生銀行合辦嘅「讀書無障礙計劃」，大爆當年曾經為咗找出患病之謎，搵專家照腦。
自爆搵過專家照腦
Sarah憶述，自細寫字成日掉轉晒，老師好厚道話：「當你寫啱啦」，但佢仍極之困擾。後來佢囝囝蕭偉中，都患上同一障礙，而且問題比佢嚴重，兩母子用盡方法記字，但始終搞唔掂，質疑自己個腦袋到底搞錯咗啲乜？後來Sarah搵到加州一位特殊教育專家，幫佢用磁力共振照大腦，分析佢串字時，腦袋有乜異樣，最後得出結論係，讀寫障礙係一種機能障礙，唔關知識事。認清問題後，Sarah確信腦袋無事，只要搵啱學習方法，一樣可以戰勝障礙。
Sarah鼓勵家長多體諒有讀寫障礙的子女，好似佢個仔咁，雖然寫字倒轉晒，但音樂同打機天分高，有次為咗拆解打機秘笈，苦讀日文，最後花半年成功考取日文文憑資格。講番近況，講嘢向來淡淡然嘅Sarah話：「都係一般退休生活。」問佢對現任環境局局長黃錦星有乜評價，佢就三緘其口話無嘢發表喎。