政情：今日你上鏡：自由黨青年團 列根「上身」

一向商界味甚濃嘅自由黨嘅一班年輕人，原來最近靜靜雞出招，設計咗款新T恤，倣效經常哲古華拉上身嘅長毛梁國雄，將代表自由主義嘅已故前美國總統列根頭像印上T恤，等市民見到列根，就諗起該黨嘅右翼理念咁話。有份設計呢件列根T恤嘅青年團主席李梓敬話，將美國右翼代表列根着上身，係畀市民知道該黨認同大市場、小政府，同埋維護傳統家庭價值等理念。唔怪得李梓敬近排言論愈來愈惹火，繼高舉反對綜援養懶人旗幟、支持保留粉嶺高爾夫球場外，嚟緊仲計劃反對動用公帑資助外國難民添！