有頭髮唔想做瘌痢，有家歸唔想做難民，情況就好比美國叛諜斯諾登，如果唔係因為踢爆「邪惡美帝」嘅監控內幕而走投無路，都唔會選擇來港避難啦，後來輾轉去咗俄羅斯尋求政治庇護，否則都唔知幾時先至攞到行街紙。
類似斯諾登嘅人其實仲有好多，香港目前有五千名透過酷刑聲請尋求庇護嘅難民。當然並非個個都係洩露國家機密嘅言論自由捍衞者，其中唔少人根本就係經濟難民，與政治完全無關，不過共通點就係有家歸不得。
有關注團體炮轟港府政策混亂，話就話簽咗《聯合國禁止酷刑公約》，實際上對待難民毫無誠意可言。話時話，部分難民嘅處境確係幾悲慘嘅，佢哋即使學有專精都唔准在港工作，子女又冇接受教育嘅機會，一個唔好彩病咗仲大劑，公立醫院唔會提供適當嘅治療，最多只係畀幾粒止痛藥就打發佢哋走。
你知啦，好多香港人都未必有得入住似樣少少嘅房屋，你估慘遭強制性失業嘅難民又點吖嗱？冇工開即係冇收入，每個月只有一千二百元租金津貼嘅難民，部分無可奈何入住比劏房更加不宜人居嘅簡陋地方，就係豬欄嘞！
入境處數字顯示，多年來共接獲一萬二千幾宗酷刑聲請，只有九宗確立；而至今年七月底，等候審核嘅三千八百名酷刑聲請人中，有八十三人被羈留，其餘獲擔保外釋。即係話，香港批准酷刑聲請嘅比率大幅落後於其他已發展嘅文明地區九條街，究竟係乜嘢原因，港府一直冇交代。
香港批准酷刑聲請嘅比率係雞碎咁多，導致絕大部分難民必須長時間滯留。大家試想想，一個有手有腳嘅人無所事事滯留一個地方三五七年，會發生乜嘢事呢？一係悶到結出蜘蛛網，一係做出種種非法行為，做黑工已經算得上傷害性不大o架喇，打家劫舍先至夠恐怖吖。
即係咁，特區政府政策混亂，其實害人又害己。喂，雖然話每個難民所得到嘅津貼少得可憐啫，不過長貧難顧呀，社會福利署每年喺呢方面嘅總支出都要二億元喎，到頭來難民被迫不事生產，子女無書可讀，更加因為游手好閒而有機會鋌而走險，做出犯法勾當，影響社會治安，而納稅人仲要替佢哋埋單，你話係咪個個都係輸家吖？
所以計功夫茶話齋，好心官老爺快快趣趣諗辦法解決難民問題啦，一方面加強把關，唔好係又收，唔係又收，另一方面加快處理酷刑聲請，唔好拖拖拉拉。仲有吖，如果真係難民，不妨容許佢哋有限度工作，須知難民唔係二世祖呀，年年月月冇工開隨時淪為亡命之徒嘅咋！