政情：家長投訴戴耀廷 教學「被佔」
香港大學法律系副教授戴耀廷（Benny）因為發起佔領中環行動（佔中）一炮而紅，但樹大招風，一班自稱係港大法律系學生嘅家長去信港大校長徐立之投訴，話好難想像Benny作為佔中搞手，點樣仲可以兼顧到教學工作。Benny就話佔中冇影響佢嘅教學工作，上學期喺大學仲做多咗嘢添。不過，佔中另一發起人陳健民就辭去中文大學中國研究服務中心主任一職，話想花多啲時間搞佔中咁話。
校方唔覺有問題
呢班家長近日就寫咗封英文信畀徐立之，質疑Benny搞佔中會影響教學工作，又要求學校解釋Benny點解可以喺大學搞佔中商討日，活動開支又係邊個找數。我哋問過Benny，佢就話六月嘅佔中商討日係透過港大民意研究計劃租用場地，佢已畀番錢民研計劃，至於教學方面亦冇受佔中影響，甚至開咗新科目，做嘢多過其他同事添，而佢亦冇畀學校投訴喎。
港大就話近日都收到唔少團體同人士就Benny表達意見，但校方就唔覺Benny喺校內履行職責方面有任何問題，學校會尊重有關意見，以及大學成員參選及舉辦活動嘅自由。