政情：澳博頒獎學金 勉勵員工子女
澳門博彩股份有限公司（澳博）尋日喺金碧文娛中心舉行本學年「澳博獎學金」頒獎典禮，向十名優秀員工子女頒發獎學金，並向二十九名尚在就讀嘅歷屆得獎學生，續發新一學年獎學金。澳博董事局主席蘇樹輝、常務董事梁安琪、董事官樂怡等高層都有出席，與員工及學生們歡聚一堂。
蘇樹輝：學業有成回饋社會
十名優秀嘅員工子女，每人每年獲頒發獎學金二萬澳門元，直至修畢大學課程。另外三名因獎學金名額有限而未入選嘅學生，亦獲頒「特別鼓勵獎」，每人獲頒書簿金一萬澳門元。梁安琪更以個人名義贊助十三萬澳門元，向其餘二十六名入圍面試嘅學生，每人頒發五千澳門元以示鼓勵。佢話，非常歡迎同學加入澳博大家庭，共同為建設澳門而努力。
身兼獎學金評審委員會主席嘅蘇樹輝話，天資同機遇不由得自己決定，只有後天嘅努力係完全由自己操控，同學必須好好裝備自己，將來學業有成回饋社會。澳博獎學金成立至今已經係第九屆，受惠員工子女共八十九人，旨在獎勵優秀嘅員工子女升讀高等教育課程，為社會培育人才。