政情：何建宗錯飲政助茶
發展局前政治助理何建宗早前遭揭發未有申報家族在新界東北擁有廠房，早前決定辭職結束只有七個多月嘅官場生涯，有人形容何建宗起初出任發展局政助時都係「半推半就」，查實呢個位置根本唔係佢杯茶，如果唔係出任呢個崗位根本未必會中箭而回。不過，亦有人認為佢因捲入漏報利益風波後辭職，其實係錯有錯着，倘若日後再有機會做官，政治風波都好難再燒埋身。
傳對古蹟保育工作有研究
新政府去年七月上任後分批公布副局長同政助任命，其中去年十二月底，何建宗獲委任為發展局政助，有知情人士話其實呢個位唔係佢杯茶。消息指，何建宗去年年中遴選副局長同政助面試時，其實首選係做環境局副局長，事關佢喺長春社做過，又曾獲委任為古物諮詢委員會成員，一向對文物保育、環保等範疇有見解。不過，最終跑出做環境局副局長嘅係前立法會議員陸恭蕙，認真係時也命也運也。
何建宗失落環境局副局長一職後，事隔多月後終「降呢」做發展局政助，有知情人士話佢一直對古蹟保育工作有研究，以為有機會喺呢個範疇大展拳腳，所以先會應承做呢個崗位，豈料至日前辭職離任前，幾乎無乜機會觸及相關工作。
有志難伸 辭官錯有錯着？
及至最近，何建宗嘅直屬上司、發展局局長陳茂波因家人被指在新界東北囤地爆出利益衝突疑雲，令新界東北發展計劃呢個政治炸彈浮上水面，之後嘅情節相信大家都歷歷在目，就係連何建宗本人都被揭發漏報家族喺新界東北擁有廠房，既然有志難伸，加上避免家人再受影響，所以何建宗下決心求去。話說回來，有人話如果當日何建宗認為呢杯茶唔係咁好飲，堅持唔飲可能避過一劫都未定。
另有官場中人相信，何建宗辭職後其實亦一片海闊天空，一來過咗冷河期後接管家族生意，二來佢呢次處理風波乾淨利落，或者有助佢將「東山復出」出任公職喎。