中環出更：洪丕正心情靚陪子買鬚刨
渣打銀行啱啱公布業績，香港區上半年勁賺八十億元，成為全球盈利貢獻最大嘅地區。渣打香港行政總裁洪丕正（Benjamin）交咗盤靚數，心情自然靚，上周六下午就偷閒去銅鑼灣電器舖購物，同行仲有老婆及一對子女。卓妮見Benjamin全程專心揀選鬚刨，唔通佢想買禮物送畀自己？查實係佢個囝囝需要個鬚刨，不過佢哋行勻兩間連鎖大型電器舖，結果都係空手而回。
當日着住件白色Polo恤嘅Benjamin，同極少公開露面嘅太太及子女出現喺時代廣場。佢哋先喺第一間電器舖揀選，Benjamin拎起一個又一個望真啲，既同家人交換意見，又向店員查詢，十分認真。
揀極唔啱心水 空手而回
着住格仔恤嘅囝囝得到佢嘅好遺傳，生得好高大，但係佢全程翹埋雙手，唔講仲以為需要個新鬚刨嘅係Benjamin添！可能囝囝啱啱長大成人，第一次買鬚刨，所以要爸爸幫手啩？佢哋喺第一間揀唔啱心水，於是行過附近另一間電器舖再揀過，一行四人睇咗近一小時，最後依然兩手空空離去。
問Benjamin點解咁好興致買鬚刨？佢就笑笑口話，唔係佢要買，而係個仔要，但始終睇唔啱。咁佢最近忙啲乜嘢？Benjamin表現避忌，唔係好想講，只係話最近忙啲，然後就好有禮貌咁講再見。其實卓妮又唔係要佢預先披露銀行業績數字，就算問咗都可以唔答，使乜咁驚呢？
卓妮