一個人貧無立錐之地嘅時候，解決宿一宵嘅問題通常只有兩個選擇，一係以相對廉宜嘅價錢租住劏房，一係以完全免費嘅形式露宿街頭。關愛基金有意向租住劏房嘅低收入人士發放津貼，本來聊勝於無都算係好事，不過官老爺話喎，工廈劏房住客冇資格接受津貼，因為工廠大廈改變為住宅用途係違反法例o架。民政事務局局長曾德成嘅講法就係咁：「瞓街唔違法，但工廈劏房屬違法。」
好嘞，按照港產官僚嘅邏輯，違法使用任何建築物都應該冇津貼啦，否則就唔係法律面前人人平等。不過好可惜吖，有區議員知法犯法，違法租用辦事處，而當局就有法不依，照樣以公帑發放津貼，夾手夾腳狠狠地摑咗曾德成一巴掌。
件事係咁嘅，有讀者向本報投訴，觀塘牛頭角道立成大廈好多個單位懷疑由住宅非法改為商業或工業用途，當中包括民主黨觀塘區議員黃啟明租用嘅辦事處。黃啟明涉嫌違反法例已經唔啱啦，其身不正，何以正人，民主黨徒再對失職官僚窮追猛打就係五十步笑百步。好衰唔衰，呢一個涉嫌違法嘅民主黨徒仲要厚顏無恥向政府申領租金津貼，八年來合共得到四十五萬元公帑交租。至於負責審批租金津貼嘅民政事務總署，唔知係發雞盲定係玩縱容，八年來從來冇質疑過相關單位嘅合法性，每個月準時向黃啟明發放全額租津，問你服未。
講到呢度，大家係咪諗起「史上最短命局長」麥齊光呢？冇錯嘞，呢一位過氣發展局局長正正係因為詐騙租津而惹上官非，繼而被告罪成身敗名裂，功夫茶真係好想知道黃啟明會受到乜嘢處置。
其實講真吖，與其話曾德成被摑一巴，不如話佢自取其辱自打嘴巴。你知啦，民政事務總署嘅老頂就係曾德成，下屬有法不依，等同上司監管失敗，署方竟然向懷疑違法改變用途嘅區議員辦事處發放租金津貼，令到局長大人所謂嘅違法工廈劏房冇資格接受津貼顯得自相矛盾。
雖然表面上同樣係違法，功夫茶覺得工廈劏房住客情有可原，情況同民主黨政客始終有分別。你知啦，當一個人唔住劏房就要瞓街嘅時候，選擇非常之咁有限o架咋，違法都係迫不得已。民主黨政客就唔同嘞，可供選擇嘅空間大得多，點解一定要租用懷疑違法住宅單位作為辦事處呢？反正都有政府提供津貼，唔違法唔使流落街頭啫！
總而言之一句到尾，區議員知法犯法絕對不能容忍。至於嗰啲處境可憐嘅劏房住客，好心關愛基金切切實實做好關愛工作啦，唔通真係逼到人哋瞓街先至安樂咩！