政情：食物銀行醫肚 小肥張啱胃口
依家啲食物銀行唔止為低收入人士提供乾糧，仲會提供埋膳食服務。不過，勞工及福利局局長張建宗（小肥張）尋日竟然去咗食物銀行醫肚，仲食得津津有味，一粒飯都冇剩添。其實小肥張只係去出席食物銀行嘅活動，因為佢事前忙得滯冇食午飯，所以去到就一味食，懶理傳媒提問。
坐慣熱廚房 汗都冇滴流
小肥張尋日下午參觀本港一間提供熱食服務嘅食物銀行中央廚房，仲試埋廚師嘅手勢。廚師為眾嘉賓煮咗薯仔燘雞，小肥張食得津津有味，仲一粒飯都冇剩添。打聽之下，原來小肥張尋日一早開會開到中午，之後就趕嚟參加活動，可能未食晏，所以簡簡單單嘅餸菜都足以令佢大快朵頤。
話時話，個中央廚房又熱又焗，大家都熱到流晒汗，但小肥張就汗都冇一滴，仲咁好胃口，睇嚟坐慣政府呢個熱廚房，耐熱能力都強啲喎。