政情：爛球場旨意奶媽湊
前晚上演英超曼聯同傑志嘅足球賽事，因香港大球場草地變成「爛地」而鬧出國際笑話，搞到親身入場觀賽嘅多名立法會議員都忍唔住要鬧爆康文署管理不善，有人更寸爆話要康文署管理場地，等於希望兼職奶媽做得好過親生阿媽。只可惜作為親生阿媽嘅民政事務局局長曾德成一直闊佬懶理，完全旨意晒康文署呢個奶媽，有乜辦法唔搞到大球場出「風癩」吖！
議員促當局認真檢討
好多議員同球迷都擔心大球場爛地會影響曼聯球星表現同球賽觀賞價值，矛頭更直指負責管理嘅康文署。立法會足球隊隊長陳克勤都有入場睇波，佢本來睇波食雞髀兼玩人浪，非常投入，但當講到大球場爛地就一把火，直言要好好檢討避免同類事件再發生。曾到英國睇賽事嘅資訊科技界議員莫乃光亦擔心，「爛地」令球員落場不落力，會令到入場球迷無癮喎。
商界議員林健鋒兒子林凱章更建議，政府應該覓地興建多一個國際級足球場，以便有後備球場應付突發情況發生。由於一眾球迷都對球場爛地有咁大怨氣，最應該負責嘅德成局長就全晚縮埋睇波，全程以「你睇我唔到」姿態避開球迷視線，反而主持開球禮同頒獎嘅商務及經濟發展局局長蘇錦樑，每逢出場就即時被在場人士噓爆，真係名副其實係「黑狗偷食，白狗當災」。
講番場球賽，其實都有好多開心事，好似漁農界議員何俊賢（高佬賢）就係第一次睇曼聯現場賽事，而且身邊仲有女伴劉小姐陪同觀賽添，當問到劉小姐係咪佢女朋友時，高佬賢笑言只係「女性朋友」喎！至於同太太入場嘅工業界議員林大輝就話，今次只係當表演賽咁睇。同場我哋仲見到前馬會主席、載通國際副主席陳祖澤（John）夫婦，原來佢哋入場係陪女兒Cat捧曼聯場。