中環出更：攝影大師楊紹明閒逛超市
香江一向多貴客，上星期五晚上大約七點幾鐘，前國家主席楊尚昆嘅兒子、攝影大師楊紹明現身中環ifc商場行超市，同行仲有一名中年女子同兩位打扮輕便嘅後生仔。楊紹明熱愛攝影，曾做過官方通訊社攝影記者，最廣為人知嘅係擔任前國家領導人鄧小平「御用攝影師」十幾年。不過，當晚佢兩手空空，只係輕鬆行超市買青瓜同番茄。
當晚楊紹明一行四人喺超市閒逛，神態輕鬆似足一家人。佢哋睇嚟好注重養生，專攻蔬果櫃位。期間同行嘅女士仲拎起個檸檬聞吓，楊紹明同佢有傾有講，似乎畀咗啲意見，但最後都係冇買到。
跟住佢哋又睇中鮮美嘅番茄，最後拎住包青瓜同番茄到收銀處畀錢。臨離去前，楊紹明被雪櫃內五顏六色嘅蛋糕吸引，但諗咗一陣都係冇買，一行人施施然離開。
香港回歸前後，楊紹明經常來香港，亦不時接受本港傳媒訪問，佢待人處事十分和善，一啲都冇架子。近年佢已好少喺香江公開現身，數數吓，佢今年已有七十一歲，不過真人望落仍然好後生，唔通鍾意影相都會令人變年輕？
前國家主席楊尚昆子
楊紹明十二歲時，獲父親楊尚昆送贈相機，自此佢就愛上攝影。後來佢加入內地通訊社做攝影記者，國家領導人成為佢鏡頭下嘅最佳模特兒，其中做鄧小平貼身攝影師十二年，成為佢響噹噹嘅成就。
卓妮