覓地起樓舉步維艱，房屋問題尾大不掉，港府病急亂投醫，唔理好醜，但求就手，嗱，「插針式公屋」各位聽過未吖？
件事係咁嘅。長遠房屋策略督導委員會訂出長遠房策初步框架，建議未來十年公私營房屋建屋目標約四十四萬個。齋睇數字係幾可觀嘅，但究竟可唔可以達到呢個目標就冇人知喇。有長策會成員承認建屋目標係「大挑戰」，因為覓地有困難。有乜辦法解救？長策會研究採用見縫插針嘅辦法，喺現有公屋空地或休憩用地加建單幢式公屋，畀單身人士居住喎。
嗱，咪話功夫茶潑冷水，見縫插針講吓就易，實施一定困難多多，阻力重重，最怕到時空有銀針，無縫可插嘅咋。試諗吓，好多屋邨已起到密密麻麻，幾乎水洩不通，仲可以插得幾支針吖？
仲有吖，公屋空地同休憩用地本來已經唔多，再失驚無神增建「牙籤樓」，意味着公共空間進一步縮水，居民唔反對至奇。今屆政府弱雞到冇朋友，任何政策都寸步難行，可以講係推出一項，跪低一項，所謂見縫插針，隨時變成自插，盞唔衰攞嚟衰嘅咋。
當局口口聲聲房屋政策係施政重中之重，弊在講就天下無敵，做就有心無力，上任一年幾，面對土地荒乜都做唔到，房屋供應最快都要四、五年後至逐步增加，搞到公屋輪候冊人龍愈來愈長，無殼蝸牛怨氣愈來愈大。當局無計可施，惟有小修小補，例如透過行政手段加快回收現有公屋單位，虛應故事，敷衍民意。問題係，呢啲小修小補連治標都唔得喇，治本更加唔使諗。
其實，香港唔係無地可用，而係有地唔用得。好似新界東北發展計劃咁，本來可以釋放出大量土地，安置唔少居民，弊在計劃不斷被政治化，根本寸步難行；更不堪嘅係，主推計劃嘅發展局局長陳茂波其身不正，被揭發涉及利益衝突，解釋又吞吞吐吐，不盡不實，佢本身已淪為政治負資產，由佢推銷計劃，根本唔使旨意可以通過。
更離譜嘅係，當局拓土建屋捨易取難，新界東北發展計劃搞到一鑊泡，但對市民要求收番粉嶺高爾夫球場嘅呼聲卻置若罔聞，叫人點相信政府增加土地供應嘅誠意吖。老實講，本港總共有七十幾個私人會所佔用官地，唔少仲係位於市區黃金地段添，只要港府肯收番呢啲地皮，就可以解決唔少問題，何至於要見縫插針吖！
由寸土必爭到見縫插針，港府畀人嘅印象根本就係大隻講。計功夫茶話齋，要市民相信港府解決房屋問題嘅誠意，一啲都唔難，只要快快趣趣收番富豪權貴佔用嘅官地，咁就一天都光晒嘞。