政情：公民講場：叫青年人從政 曾鈺成嘥氣

立法會主席曾鈺成最近不時將香港政治人才問題掛喺口邊，佢尋日出席香港青年協會嘅活動時，又再鼓勵在場近二百位青年人從政，仲話如果香港要邁向普選及有優質民主制度，就有賴政治人才喎。佢仲話，雖然唔係每位青年人都諗住從政，但仍希望有部分人會立志從政。不過，回望近十年政治環境，做官或議員嘅背景唔白過張白紙都唔掂，無論任何投資包括炒股或炒樓、甚至做生意一個唔小心都可能被人話官商勾結，甚至存在利益衝突，就算家人親戚從商，都要求全部申報，幾乎要查三世書查晒三代，咁樣仲會有咩人肯從政呢？