佔領中環（佔中）行動發起人戴耀廷講過希望宗教界都支持佔中，但天主教香港教區副主教楊鳴章就表明現階段唔支持佔中，亦唔想捲入呢場政治角力，更呼籲中學生唔好參與佔中。楊鳴章嘅立場顯而易見，但號稱「李漢奸」嘅民主黨創黨主席李柱銘就以德國納粹時期好多修女神父都會收留保護被拉嘅猶太人做比喻，指天主教會冇理由唔支持佔中，更變相將香港警方比喻作納粹黨，認真離譜。
李漢奸早前已噏得就噏提出「跪低」政改方案，最終都要再「跪低」收回，瘀爆收場，但尋日佢出席一個話劇籌款時又再亂噏廿四，竟然話楊鳴章唔係反對佔中，只係唔會以教會名義參加佔中啫。佢仲話教會已經唔係好似幾百年前咁，剩係叫人喺聖堂祈禱，一定要照顧社會大事，如果社會有巨大民主訴求，冇理由天主教會話唔支持民主喎。講到咁前瞻，莫非佢發緊白日夢當咗自己係教宗？
李漢奸講到興起之際，更以二次大戰時期作比喻，話當時好多修女神父都打開教堂門去收留保護納粹黨想捉嘅猶太人，雖然呢個做法都係犯法，但係以人道作為出發點，可以保護人民咁話。咁講法，李漢奸係咪想將香港警方等同納粹黨呢？又係咪要啲修女神父支持佔中，去收留保護被拉嘅違法佔中人士呢？亂咁噏因住又惹起爭議呀！