政情：筲箕艷星扭棠哥耳仔
行政會議成員兼工聯會榮譽會長鄭耀棠日前自創「艷星論」，為西環嘅「篩選論」護航，以「好似西方普選咁，整啲艷星出嚟，咁係咪我哋想見到嘅呢？」講明特首選舉一定要篩走艷星，隨即引起全城圍剿，昔日艷星、甘肅省政協彭丹率先同棠哥劃清界線，就連日本AV女優「蒼井空」及仙遊嘅「奇女子」「狄娜」都忍唔住贈棠哥兩句，仲輪流扭甩「棠哥」耳仔，棠哥呢鋪認真濕滯！
「周秀娜」「蒼井空」要求道歉
講緊嘅係有婦女團體代表，尋日放低屋企嘅砧板、菜刀，掛住兩個筲箕裝「胸」作勢，變身Ｂ貨「筲箕艷星」，浩浩蕩蕩上街。佢哋鬧爆棠哥嘅「艷星論」歧視艷星兼公然侮辱女性，要求佢收回同道歉，又喺政總門外上演街頭劇，派出成員扮演o靚模始祖周秀娜、彭丹、蒼井空同狄娜，實行集齊中日艷星代表同場，諷刺棠哥唔肯道歉，要被艷星圍攻，現場嘅「棠哥」最後都要自扭耳仔謝罪。
不過，婦女們就大意地將抗議橫額上形容愛美神飛彈嘅「bomb」寫成「bome」，除咗睇到大家一頭霧水外，更重要嘅係bomb解作圓碌碌嘅炸彈，冇導彈或飛彈嘅意思喎！
婦女參政網絡主席劉家儀認為英文串法唔重要，最緊要係艷星都尚且敬業樂業，但棠哥就趁行會放暑假連日龜縮，唔肯再就「艷星論」表態，連一向為婦女爭取權益嘅黨友陳婉嫻都冇聲出，激到佢哋威脅要向平等機會委員會投訴。
其實棠哥對當代國際政治唔係太熟書，日前就有網民羅列艷星參政嘅成功例子。邊個話艷星就冇腦、冇質素呢？睇嚟棠哥真係要道句歉先至可以和氣收場，所以話呢，時下女人唔好蝦o架！