中環出更：楊志雄女兒 入商會賺友誼
本港只收女性做會員嘅組織唔多，城市女青年商會就係其中之一。身為八十後嘅會長楊嘉欣（Kathy）及成員個個都活力充沛，年輕實幹，原來Kathy年前從美國加州返港發展家族事業，想拓展周邊人脈，恰巧遇上友人介紹加入該會，努力五年後終出任會長。日前Kathy同上屆會長周清心（Dora）及下屆候任會長黃詩韻（Anna）相聚一刻，為該會未來幾個活動作好準備。
Dora屬於創會功臣，處理會務經驗豐富，該會旗艦活動「全港時尚專業女性選舉」，佢都有份構思，Kathy同Anna周不時向佢取經。讀電子工程出身嘅Kathy，現於富士高實業嘅產品市務部工作，佢爸爸就係中華廠商聯合會副會長楊志雄。佢話加入城市女青年商會訓練咗佢嘅領導才能，最難得嘅係賺得友誼。
女會長佔半邊天
Kathy話，香港兩性地位愈趨平等，今年國際青年商會（JCI）香港總會十九個屬會之中，有九個會長都係女性，差不多同男性睇齊，咁啱今屆JCI世界會長都係女性，令姊妹們感到鼓舞。
卓妮