中環出更：孫秉樞88大壽 鐘錶界齊賀老行尊
鐘錶界老行尊、新達集團主席孫秉樞一向深受業界推崇，鐘表業總會會董們年年都幫佢慶生日，今年佢過八十八歲大壽，近百名業界齊去賀壽，包括主席區宇凡、副主席高鼎國、張繼東及黃麗嫦，仲有前主席梁青華、朱繼陶及陳正欣等人。現場播放珍貴圖片及報道，重溫壽星公當年英姿及威水史，加上唔少老友上台玩爆料，搞到壽星公笑話要沉默應對。
孫秉樞嘅長子孫大為（David）及細仔孫大豪（Harold）亦攜家帶眷去賀壽。Harold好少喺香港公開露面，事關二十年前佢被父親派到新加坡，負責睇住當地嘅鐘錶生意，經常星港兩邊走。當晚趁大仔Justin放暑假，所以偕太太一齊去祝壽。
孫兒分享教誨 「人生如單車」
David個大仔智威啱啱讀完書返港工作，就上台分享爺爺以單車喻人生嘅教誨。佢話阿爺教落，一個人後生時就好似踩單車，可以追求速度，跌低再爬起身，唔使怕。隨住年紀增長就要放慢速度，不過寧慢勿停，否則就好難再重新上路。孫秉樞就分享養生之道，秘訣係日日游水、打波健身，即使去年做咗通波仔手術都冇有怕，身體仍然咁健康，思路清晰。
當晚老友送嘅生日禮物好有心思，包括一幅由業界活動相片砌成嘅88字畫，又有新款智能手機，事關佢哋要「強迫」壽星公學玩WhatsApp，以便加入鐘錶界老友嘅吹水群組，咁過兩年就會變成「九十後」喇！孫秉樞開心笑到見牙唔見眼，話幾十年來業界對佢咁愛戴，就係最好嘅生日禮物。
卓妮