食海鮮，蒸扇貝，相信係唔少香港人嘅心頭好，事關扇貝嗰一粒「閉殼肌」好大粒，咬落鮮甜又啖啖肉，不知幾鬼死好味道，正呀喂老友記！
之不過咁喎，大家又有冇諗過原來食扇貝其實有危險o架？深圳不久前被揭發鎘含量嚴重超標嘅有毒扇貝通街賣，勢估唔到一水之隔嘅香港同樣遭殃。本報記者喺香港街市及海鮮檔四個地點購買扇貝樣本，然後委託一間化驗所檢測，結果係非常之咁得人驚。全部四個樣本嘅重金屬鎘含量都超出歐盟最高含量限值，介乎三至近八倍之間。超標最高嘅來自大埔街市，每公斤含八點九毫克鎘，較歐盟最高限值每公斤一毫克高出接近八倍。即使係含鎘量最低嘅樣本，每公斤都有四點五毫克鎘，仍然係超出歐盟標準三點五倍。
大家可能會問，點解話超出歐盟標準，而唔係超出香港標準？答案好簡單，因為自稱國際大都會嘅香港居然冇標準！
即係咁，食物安全中心名不副實，一直拒絕為扇貝鎘含量定下最高含量限值，即係唔重視食物安全咁解囉。呢一個「食不安全中心」嘅發言人只係話，雖然本地《食物攙雜（金屬雜質含量）規例》未有制訂鎘喺扇貝嘅最高含量限值，不過會透過風險評估，估計市民攝取量，再以國際組織訂定嘅安全參考值判決是否合格，去年抽取六十個扇貝樣本測試包括鎘嘅金屬雜質，結果全部合格。
冇標準都話合格？計功夫茶話齋，「有斷估冇痛苦」嘅食物安全中心表現唔合格就真！
喂喂喂，全世界稍為先進嘅地區都會為扇貝鎘含量上限定出標準o架啦，就算對扇貝規管最寬鬆嘅美國，最高含量都唔容許超過每公斤四毫克，內地定為每公斤二毫克，要求最嚴格嘅歐盟係不得超過每公斤一毫克。香港竟然連內地都不如，規管全無標準可言，你話羞家唔羞家吖？
羞家都仲係其次，弊一弊都冇咁弊嘅係食得鎘多人中毒。香港醫學會前會長蔡堅指出，食咗含鎘量高嘅扇貝可導致急性中毒，長期進食更加會損害腎臟。內科腫瘤科醫生邵祖德補充，鎘會損害免疫系統甚至致癌，可能令到孕婦誕下畸胎。
功夫茶考考大家，知唔知江瑤柱係乜東東？其實江瑤柱好多時候係取自扇貝嘅閉殼肌，未曬乾之前又叫做帶子。亦即係話，連江瑤柱都有機會含鎘量超出歐盟標準呀，冇陰功！
所以話啫，本地官僚確係害人不淺，檢測扇貝全無標準可言，普羅大眾中咗毒都唔知啦。唔該食物安全中心做下好心，盡快同歐盟或者內地看齊，否則搞到香港通街都係畸胎就罪孽深重喇！