政情：公民講場：漏報講到應分 發叔賴地多

發展局局長陳茂波被揭發其妻家族喺古洞有幅農地，涉嫌利益衝突，佢連日來喺香港同天津，解釋完一次又一次。政界又沸沸揚揚，討論問責局長同行政會議成員嘅利益申報係咪有問題。喺呢個時候，已經唔係行會成員嘅立法會發展事務委員會主席劉皇發又被質疑漏報咗塱原有塊地，發叔尋日話，已經向立法會申報，但就話漏報都唔奇，事關佢有好多地，但會盡量做到申報利益具高透明度，又話只有唔做發展事務委員會主席，先至唔會有利益衝突喎！發叔講到就算係漏報都唔係錯咁，其滋油淡定，當然唔係熱廚房裏面嘅陳茂波可以比擬啦！