建制派近年搞好多內地團，獲得嘅訊息都係要保持香港繁榮穩定，希望香港青少年做愛國愛港嘅薪火傳人。言猶在耳，原來有親中人士正密密做工夫。有親中消息指，建制派未有因為德育及國民教育科獨立成科一事泡湯「被打沉」，其中有「梁粉」更醞釀反擊，向教育局倡議將中史科列為必修科之餘，仲有意建議提早至小學開始就要修讀中史科。
不過，眾所周知，被揶揄為「唔得掂」嘅教育局局長吳克儉曾形容中史科喺中學文憑試最受歡迎科目中排第八，形容仍然屬於受歡迎嘅科目，有人自言建制呢場反擊戰要到位，首要係強力游說吳克儉為中史科成為必修科「開綠燈」，因為講到尾教國情由讀歷史開始，培育新一代要有愛國精神，否則一切都只係停留喺吹水階段。
不過，亦有人話呢班梁粉提倡嘅中史科，同佢哋心目中想要嘅國民教育根本係兩回事，即使令新一代從歷史中認識中國，甚至從而變得愛國，但並不代表新一代會愛黨，所以始終未能解決長久以來根本嘅核心問題，反而國家點樣令新一代心悅誠服先至係關鍵。