政情：阿基 哪吒「垃圾聯盟」
立法會議員馮檢基尋日聯同西貢區區議員方國珊（哪吒）及南區區議員司馬文，齊齊出動摷垃圾，呼籲市民做好垃圾分類。佢哋話喺垃圾問題上志同道合，以後有關政策都會一齊探討，提供建議畀政府。不過，三位來自唔同地區，政治背景又唔同，今次無端端走埋一齊，有傳阿基想借助哪吒嘅人氣打入新界東選區。唔知佢哋真係單純想組織一個「垃圾聯盟」吖，抑或真係有選舉目的呢？
阿基邊分類邊博搶鏡
阿基、哪吒同司馬文等人尋日喺灣仔港鐵站外搞咗個垃圾分類活動，仲搵啲助理守住個垃圾桶，以防食環署嘅清潔工人清理桶內嘅垃圾。當活動開始時，佢哋就手持橫額，話資源回收要有新思維，整合部門，再喺地區做回收。阿基倡議政府成立「資源循環管理局」負責資源循環及綠色產業發展；哪吒就話政府要做好資源回收，以後先可以「零堆填」喎。至於司馬文就認為依家政府做嘅分類工作太繁複，建議「乾濕分類」。
三人之後就開始分類工作，佢哋戴起醫療手套，伸手入一半滿嘅垃圾桶，執起垃圾，再逐一分成乾濕兩類，直至全部垃圾都被分類為止。過程尚算順利，只係喺活動開始唔夠五分鐘，天降大雨，搞到要移師天橋底進行，而阿基就喺分類垃圾期間，不時望實傳媒嘅鏡頭，真係識搶鏡。
講番呢個「垃圾聯盟」組合，哪吒一向都喺將軍澳主打堆填區議題，而司馬文就一直有關注環保政策，只係唔明呢三個大纜都扯唔埋嘅人點解會一齊講環保。阿基話，喺立法會選舉時已認識司馬文，而且對方亦曾幫佢選舉抬轎。至於哪吒就因為搞將軍澳堆填區問題時，大家傾開偈又覺得志同道合，所以今後會一齊探討環保議題喎。
其實阿基所屬嘅民協喺新界東嘅實力確實唔高，相反哪吒就算習慣喺西貢區單打獨鬥，喺整個立法會新界東直選都仲差咗啲人氣，所以唔知係咪呢啲原因而令佢哋走埋一齊呢？不過，如果佢哋真係結盟嘅話，相信可以互相補足。