孔老夫子話，「苟正其身矣，於從政乎何有？不能正其身，如正人何？」意思好簡單，能夠端正自己嘅行為，從政完全冇難度；相反，自己行為不檢點，又點能夠令其他人端正呢？功夫茶唔係想拋書包，而係有感而發，今時今日，港府固然其身不正，而立法會亦唔好得去邊，最多係五十步笑一百步嘅咋。
呢，立法會議員成日批評政府亂花公帑聘請顧問，而且用人唯親，其實唔少議員自己亦係咁。本報翻查全體立法會議員上任至今申領嘅工作津貼紀錄，發現議員經常聘請「自己人」，其中最離譜係新同盟議員范國威，佢被本報踢爆為前議員鄭家富申請多個立法會泊車證違規泊車後，又被揭發以公帑聘用多名同屬黨友嘅區議員出任立法會助理，變相雙重支薪。同樣，建築界議員謝偉銓及多名自由黨議員，亦被揭聘用與所屬團體或政黨成員有關連嘅公司擔任顧問，每月申領公帑由二萬幾至五萬幾元不等。議員用人唯親，同當年煲呔曾爵士用公帑聘請副局長及政治助理打造曾家軍，根本冇乜分別。
原來，立法會有指引禁止議員聘用自己親人出任助理或顧問，並建議盡量唔好僱用由所屬政黨營運嘅公司，但對於聘用個別黨友或黨友開設嘅公司就完全「無王管」，唔怪得咁多議員博懵喇。就以范國威為例，佢先後聘請同屬新同盟嘅區議員丘文俊、關永業及任啟邦出任助理，月薪由六千五百至一萬元不等，主要負責協助佢處理地區議員辦事處嘅求助個案，但三人同時又向區議會支取月薪及工作津貼，你話喇，佢哋究竟係為立法會定係為區議會工作？做一份工支兩份薪金，咁仲唔係搵納稅人笨？
正如學者話齋，議員鍾意聘用信得過嘅黨友，做法無可厚非，但必須向公眾解釋原因，交代收費係咪合理，否則都幾難洗脫濫用公帑嘅嫌疑。
講到濫用公帑，咁都未算吖。上屆多名民建聯立法會議員被揭以議員津貼印製大批日曆、月曆及利是封，免費派畀選民，被質疑係另類「蛇齋餅糉」，原來新一屆立法會同樣有多名議員咁做，當中最大筆支出又係來自范國威，佢去年底豪花十萬九千元公帑，印製五萬個月曆派街坊，簡直比建制派議員更加「狼死」。
所以話，五十步唔好笑一百步。議員以民意代表自居，批評政府往往滔滔不絕，振振有詞，可惜有口話人冇口話自己，佢哋自己其身不正，試問又點能夠正人呢？一句到尾，行政立法亂鬥亂，香港想唔烏煙瘴氣都幾難！