寶誕將近 祈福行好運
嚟緊嘅星期五（農曆六月十九日）就係觀音誕，位於澳門望廈嘅觀音古廟，到時一定人山人海，唔想同人逼到身水身汗，有時間最好就預早去拜神，而嚟自十八桑拿嘅小惠同小爽，雖然都係九十後，但異口同聲話要去拜神喎！
浪費光陰
小惠：我聽啲姊妹講呢間古廟喺明朝就有，有成幾百年歷史，香火非常鼎盛，嚟求籤特別靈驗，所以我都想去拜神，睇吓今年可唔可以搵多啲！
小爽：我都想去拜神求支姻緣籤，因為我同上一個男友分手之後，足足三個幾月，竟然冇新戀情出現，我都已經主動出手，但一樣食白果，無功而還。
小惠：成日掛住拍拖，工又唔返，難怪餓到你咁瘦，好心你就收拾心情，專心工作，努力啲搵錢仲好啦！只係顧住「埕埕塔塔」，簡直係浪費光陰呀！
小爽：你識乜嘢吖！有個男朋友喺身邊，做人至會有意義，返工嘅時候咁悶，工作又辛苦，當你知道有個人正想住你、掛住你，工作都特別有動力。
繼續搵錢
小惠：你發姣就發姣啦！畀你求到個男人返嚟，咪畀我睇死，到時一樣係唔返工，成日掛住同男朋友尋歡作樂，到你哋床頭金盡，咪又係不歡而散！
小爽：你咪一樣，畀你搵到錢，咪又係繼續搵錢，唔通你肯放假休息吓，去外國旅遊散散心咩？你一年三百六十五日都掛住搵錢，會開心咩？
小惠：講得啱！畀我搵到錢，我又會再繼續，不如今日去觀音廟，唔求搵錢發達，就求可以生活得開開心心，有機會嘅話就出國旅遊，歎吓世界！
小爽：咁就啱啦！我都唔求一定要有男朋友，只求姊妹們生活開心，心想事成，不過！人哋觀音古廟下午五點就關門，我哋要拜神就要早啲去啦！