政情：前高官遊阿富汗 帶區旗當保護罩
唔少人退休之後都愛遊埠歎世界，但有人選擇挑戰高難度，冒性命危險走訪戰亂國家。作家雲海同旅遊作家項明生（James）兩個「旅遊達人」尋日出席書展活動，交流刺激嘅旅遊經驗。期間雲海大爆，唔少前政府高官都鍾意跟佢出團，深入阿富汗、伊拉克、車臣等守衞森嚴嘅地區。
雲海爆旅伴遊歷
雲海話，有次佢哋到訪阿富汗，一行十一人中，其中一位係姓王嘅前政府新聞處官員。正當佢哋打算參觀巴米揚大佛時，導遊拒絕前往，仲將佢哋困喺酒店內。佢哋就叫導遊替佢哋租架軍用直升機，該名前官員仲建議，將特區區旗掛喺直升機外以策安全。最後佢哋因租機費高昂，放棄有關行程。
後來雲海話唔少前高官在任時經常外訪，漸漸愛上旅行，退休後相約四處遊歷。佢話，該名姓王官員好早期已「踩線」到訪多個敏感地區，有次喺西伯利亞畀人拉咗，最後「耍官腔」甩身。問佢點解要帶特區區旗去旅行？佢話係為咗方便溝通交涉，有啲團友仲會隨身帶備中國國旗同襟章以證身份喎。