政情：謝偉俊新戰車 惹同志疑雲
彩虹圖案喺外國時常被喻為同志其中一個標誌，立法會議員謝偉俊（Paul）近日面世嘅青綠色新議員戰車，巧合地驚現彩虹圖案喺車身上，搞到阿Paul惹來同志疑雲。阿Paul解釋，佢部戰車嘅彩虹圖案與同志無關，只係代表兼容同包容性，又笑言只係借用某部電影中展示彩虹圖案做宣傳嘅橋段喎。
立法會地區直選不時要落區同選民接觸，阿Paul尋日就喺社交網站上載佢同新議員戰車合照，呢部戰車其實係舊車活化外觀，以青綠色為主色，車身印有「法律超人，健康民主」等字句。
不過，最令人感興趣嘅係，阿Paul架戰車驚現彩虹圖案喺車身上，好多人都將彩虹與同志拉上關係，莫非阿Paul話中有話？
九月開新辦事處
阿Paul話，其實佢架戰車嘅彩虹圖案同同志係無關，只係代表兼容同包容性，至於車身嘅青綠色，佢承認呢個顏色係自己拍板揀嘅，一來青綠色可表達環保訊息，二來佢五行同綠色、紅色嘅顏色都好夾喎。此外，阿Paul亦密密開設議員辦事處，其中牛頭角下邨辦事處將於九月底開張，唔知到時佢架新戰車會否成為焦點呢？