政情：田二少狂掃舊「黑莓」備用
人人用智能手機都有唔同口味，好似立法會議員田北辰就話自己好揀擇，多年來獨沽一味只愛「黑莓」手機，因為處理文書夠快夠方便。不過，近日佢知道「黑莓」要改用輕觸式鍵盤，聲言自己手指粗可能禁唔到，於是一口氣狂掃十部依家用開嘅同款手機，作為日後備用。
買十部「用到退休」
田二少日前現身一個就職禮時，見佢拎部灰白色「黑莓」出嚟左禁右禁，打字速度快得驚人，皆因呢部手機用咗好多年，真係合埋眼都識禁。時下流行輕觸式鍵盤，佢就話唔多like，每次用手指篤鍵盤時，好易篤錯隔籬，激氣到極，可惜「黑莓」都逐步改用輕觸式鍵盤。
為免將來冇機用，田二少年前已經大量入貨，一次過買咗十部依家用開嘅同款手機，用舊咗就換，依家已經用到第三部，仲有七部存貨。咁用晒存貨後點算？田二少答得風趣：「等到用埋嗰七部手機，我都退休啦！」講到叉住手機講電話好易意外，原來佢向來都有呢個習慣，話以後都唔敢喎。