政情：部門「佳作」書展堆填
每年一度嘅書展已展開，政府新聞處例牌代表各部門開檔賣書。不過，唔知政府係咪眼見堆填區擴建無期，擔心將來垃圾圍城唔知點收科，新聞處就出一分力，今年特別收集各政府部門賣唔出或冇人要嘅實務守則，一口氣放晒喺書展推售，相信可減輕堆填區嘅負擔，但可惜拍晒烏蠅，大家只要睇吓新聞處賣啲咩書就知喇！
新聞處今年以「你看上哪一本？」為主題開檔，各大部門都有貢獻，好似機電工程署嘅《升降機及自動梯設計及構造實務守則》盛惠一百五十三元，識英文嘅仲可以打個六折添！屋宇署推出《地盤監督作業守則》，○九年「復刻版」只售九十五元，新入行嘅地盤工人想要都未必有，莫非新聞處想啲工人買嚟留念？
而九七年為慶祝特區成立出版嘅《邁進新紀元》圖冊就由六十八元劈價至十七元，仲明目張膽放喺「新出版刊物」專區，同過去三年嘅香港年報一齊扮新書，唔通新聞處以為未拆封嘅書就叫新書？但無論如何，本書賣咗十六年都未清貨，咁落去睇怕邁進銀禧都未必賣得完，丟去堆填區在所難免。
至於想學車嘅市民就更為有福，因為大家學車考筆試報名送嗰本黃色書仔《道路使用者守則》，新聞處個攤位只需以「優惠價」十六個半就可以擁有多一本。咁都叫優惠，新聞處唔驚觸犯新修訂嘅《商品說明條例》畀海關檢控咩？再講，唔知學車嘅人買多本守則嚟做乜呢？莫非政府預期啲人會讀爛本守則？
議員撐碼頭工新書淡靜
另外，有幾位立法會議員都有出新書同搞簽名會，其中宣傳教英語新書嘅葉劉淑儀同黃毓民就較受歡迎，好多粉絲爭住搵佢哋簽名，相反李卓人撐碼頭工人嘅新書就淡靜得多。
新聞處耗費公帑競投個檔位，求其搵啲實務守則充撐場面就算，試問點揀得落手呢？睇嚟政府新聞處處長黃偉綸都要得閒落去幫手拍吓烏蠅喇。