中環出更：「暗瘡剋星」自製辣椒農藥
九龍樂善堂常務總理楊小玲（Jackeline）因為幫人治療暗瘡，堪稱「暗瘡剋星」，同時亦深入研究養生之道。Jackeline話，佢日日奔波於校園、電台等大小活動，教人點樣擁有健康人生，平均一年要跑六十幾場，真係忙到冇時停。不過，佢好享受呢種散播健康種子嘅生活，仲喺自家屋企種起瓜菜，連農藥都以辣椒碎加水自製，夠晒有機。
加入樂善堂更忙
早前有日下午，Jackeline忙裏偷閒，同多年好友兼黎國光律師事務所總經理黃雪梅約埋飲茶。Jackeline話，健康嘅皮膚同情緒、作息及飲食有關，佢唔介意將正面訊息傳播出去，事關佢當自己做緊善事。兩年前佢加入樂善堂，參與該堂嘅教育、醫療及社會福利等日常事務，忙上加忙，慈善工作已佔去六成時間。
雖然咁唔得閒，難得Jackeline依然笑得燦爛，話一個人要捨得回饋社會，達致心靈富有，才算真正富有。佢仲日日喺社交網站筆耕，教人點樣煮時令湯水消暑，難怪佢有咁多粉絲喇。
卓妮