中環出更：拒談搵貪湯助查 金刀梁密實過廉署
綽號「金刀梁」嘅香港大學校務委員會主席梁智鴻平時工作忙碌，但卓妮尋日就見佢同太太喺中環置地廣場一間餐廳撐枱腳，醒起佢係「檢討廉政公署處理公務酬酢、饋贈及外訪開支制度程序委員會」成員，梗係要追問佢有冇要求「貪湯」前廉政專員湯顯明協助調查啦，但金刀梁就點都唔肯透露調查情況，淨係話委員會依家仲調查緊，會喺四個月內提交報告，把口真係密實過廉署。
貪湯在任廉署期間亂花公帑送禮、宴客及外訪嘅醜行令人髮指，反映廉署用公帑幾近無王管，就算政府成立委員會去檢討，並請相關人士提供資料，但過程中會否有人採取不合作態度，因而影響委員會調查呢？金刀梁話，唔單止會請貪湯協助調查，其他人都會邀請咁話，總之一味以「都係咁樣調查啦！」作回應，把口唔只密實過廉署，而且仲識「耍太極」添，真係薑愈老愈辣。
陪妻恩愛撐枱腳
原來金刀梁尋日都要返診所工作，但中午都忙裏偷閒陪太太食晏撐枱腳，期間有傾有講，到食完嘢侍應執埋枱，佢哋都雞啄唔斷，直到遇見三位朋友，佢哋先齊齊同人打招呼寒暄。雖然金刀梁有事在身，但佢同太太離開餐廳之後並冇急急腳閃人，仲同太太翹住手行街。卓妮見佢哋搭扶手電梯時，金刀梁仲拖實太太，非常恩愛。
卓妮