好咯好咯，謝天謝地，無論你係正常消費者定係病態購物狂，從今日開始應該可以放心付鈔，冇必要繼續擔心自己淪為黑店奸商磨刀霍霍斬到一頸血嘅羊牯，事關新嘅《商品說明條例》今日生效，理論上消費購物吃喝玩樂將會得到信心保證。
修訂之後嘅《商品說明條例》涵蓋範圍將會由一般貨品擴展至服務業，並且規管誤導性遺漏、威嚇性營業以及餌誘式廣告等等不良營商手法。譬如話，旅行社常用嘅宣傳語句「天天出發」以及「保證成團」等等字眼，有機會誤導顧客而構成犯法行為。有旅行社業界人士話喎，「保證入住某某酒店或同級」將會成為絕響，唔會再出現於宣傳單張之上，以後一定寫明係邊間酒店，唔可以寫同級咁含糊。
至於一連七日舉行嘅香港書展，適逢新修訂嘅《商品說明條例》生效，參展商今年嘅宣傳策略亦轉趨平實，避免採用「最暢銷」或者「最好賣」等等吸引眼球嘅講法。假如商戶未能提供實質證據支持宣傳語句，會有乜嘢後果呢？法例規定最高刑罰可判罰款五十萬元及監禁五年。
咦咦咦，家長最關心嘅嬰兒奶粉又點呢？有部分品牌吹噓「最多兒科醫生推薦」喎。消委會就話嘞，營商者唔好使用過時又唔全面嘅另類資料作為支持理據，咁樣有機會變成誤導性遺漏嘅不良營商手法，從而惹上官非。
簡單咁講，有咗新嘅《商品說明條例》之後，奸商取巧嘅難度大得多，黑店宰客嘅障礙會多咗，顧客冇咁容易受騙，即使真係無辜辜受騙都有法可依將不良營商者告到甩褲。
之不過功夫茶始終有一個憂慮，你知啦，港式官僚好多時候難以捉摸o架，就算有法可依都未必依法辦事。最明顯嘅例子莫過於滿坑滿谷嘅僭建房屋，學似特首落選人唐英年話齋，僭建就係僭建，違規就係違規，哈，特區政府竟然長年累月冇執法喎，搞到違規案例沒完沒了，鄉紳有鄉紳僭建，權貴有權貴犯法。
即係咁，《商品說明條例》嘅用意係防止商戶誤導，有冇人能夠防止負責執法嘅官僚搵笨呢？所以功夫茶建議將法例嘅涵蓋範圍擴展至高官嘅服務承諾，如果有從政人員以誤導性字眼欺騙市民，一於拉去收監法辦。
舉個例子吖，梁振英角逐特首嘅時候拍晒心口話「活化工廈」，將荒廢嘅工廈改建為住宅，點不知發展局一個屈尾十竟然話此計不通，活化工廈頓成泡影。競選承諾冇兌現，算唔算誤導性遺漏呀？算唔算餌誘式廣告呀？唔坐監都應該罰款啦，吓話！