港大民意最新調查發現，特首梁振英的支持度創他任內新低。其實，「七‧一」四十多萬人上街後，根本毋須調查都估到ＣＹ嘅民望係負數，創新低亦係意料之內！
孔子講過：「取法乎上，僅得其中；取法乎中，僅得其下。」一開始，ＣＹ便展開「取法乎上」的姿態，舉起張「齊心」嘅矮板櫈，整支平靚正嘅原子筆，頗有「男兒不展風雲志，空負天生八尺軀」的架勢，振臂一呼：「從此只有香港營！」之不過，講嘅同做嘅完全兩回事，好醜不分，是非不明，用人唯親，倒行逆施……幾乎一個有為從政者唔應該犯嘅錯，佢全迎難犯上了！
係人都知香港係福地，遠離天災，唯一水浸得最厲害嘅係「庫房」，政府用錢方面唔使頭痛，加上港人多數知足；之不過古人話齋：德澤太薄，家有好事，未必是好事。港人怨ＣＹ管治無方，用人不當，而ＣＹ搞到香港一鑊泡，成為示威之城，一年下來，ＣＹ要怨嘅只能怨自己！「仁義不施，而攻守之勢異也」。
香港回歸十六年，三任特首均不濟，董建華無能、曾蔭權好發春秋大夢、梁振英未知「恥其言而過其行」，講得漂亮，做得肉酸！打壓正義傳媒與前朝貪曾如出一轍，一葉知秋，其施政之所謂「公平公正」可思過半矣！
至於用人，無論局長、翻閹舊電池如周一鑊之流，行政會議成員一再爆醜聞，更可見其用人「靠估」。曾國藩論清朝末年人才所以委靡，舉出當年京官兩大通病，即退縮和瑣屑。他說：退縮者，同官相推，不肯任怨，動輒請旨，不肯任咎是也；瑣屑者，利析錙銖，不顧大體，察及秋毫，不見輿薪是也。
ＣＹ之問責高官，退縮和瑣屑者佔多，「劏房波」做發展局局長根本係錯配，「唔得掂」掌教育言出必錯……咁嘅管治班子，求苟安都難，何況振作有為？