新政府上任至今一年多，基本上多個重要課題都有一定諗法，但唔代表就可以閉門造車。最近以中央政策組首席顧問邵善波為首嘅中策組開始動作多多，疑似開動諮詢機器，接連召集二十多名中策組特邀顧問開會，就社會時事熱點問題「腦震盪」，期間邵善波一見到重複觀點就會叫停發言，講到明要聽啲新意見或者未曾在傳媒見過嘅想法喎。
消息話，中策組最近增加唔少小組會議，專門討論部分具爭議性嘅課題，包括政改及扶貧問題，其中就政改為例，據聞有人促請港府開展政改諮詢時要有實質方案拋出，有人仲話要參考八十年代起草《基本法》時嘅做法，應該邀請各路英雄加入委員會商討普選議題，呢啲意見相信對於政制及內地事務局拍板展開政改諮詢時，有一定嘅參考價值。
另外，中策組原本已有二十三名特邀顧問，但最近因應需要又再委任嶺南大學政治學系副教授及公共管治研究部主任李彭廣、恒生管理學院商學院院長蘇偉文等五至六人加入，唔知中策組會否因應人數增加，對於各方議題嘅深度更有要求呢？