政情：怪醫轉性 響鐘叫人開會
有「怪醫」之稱嘅醫學界立法會議員梁家騮平日行蹤飄忽，每逢投票或關鍵時刻都經常唔見人。不過，尋日怪醫竟然長駐會議廳，仲不時細心聆聽其他議員發言，發現唔夠在席議員就要求主席響鐘call人開會，莫非佢領悟自己唔在席時，其他議員對住空氣發言嘅苦況？抑或佢知道自己嘅出席率包尾，想洗走懶蟲之名呢？
「年度之作」趕客
其實尋日討論嘅係怪醫提出嘅「年度之作」，即係動議要求解散醫院管理局，佢之前已經提出過類似動議，但佢依然火氣十足批評醫管局多年不務正業，要求政府解散醫管局，將啲資源跟住病人走好過。不過，期間怪醫發現聽佢發表偉論嘅議員唔多，於是竟然效法泛民主派拉布議員慣常做法，要求主席點算開會法定人數，響鐘call人開會。
當鐘聲響起，有滿口餅乾嘅建制派議員投訴怪醫阻住佢食茶點，議員黃定光批評佢「怪醫出怪招」，議員謝偉俊仲批評「懶蟲竟然會響鐘」。雖然講來講去都係三幅被，動議亦預咗被否決，但食物及衞生局局長高永文仍然不敢怠慢，用足三十二分鐘反駁話醫管局有助提升醫院服務效能，水平深受國際認可。