政情：爆粗大狀隨時釘牌 馬恩國須紀律研訊
身兼大律師嘅民建聯黨員馬恩國，今年二月出席立法會政制事務委員會公聽會時，曾與「長毛」梁國雄爆爭拗，期間突然以一口流利英文爆粗「You are not even a f××king Chinese」，從此一「爆」而紅。事後人民力量周峻翹同社民連黃浩銘隨即向大律師公會投訴，經過幾個月調查後，大律師公會決定將馬恩國嘅行為操守呈交「大律師紀律審裁組」進行紀律研訊。
輕則罰款50萬
咪以為紀律研訊無乜嘢，根據《法律執業者條例》，如果係嚴重性質，分分鐘會被除名，甚至被吊銷牌照（俗稱釘牌）。如果罰得輕啲，就有可能被譴責，或者向政府支付最高五十萬元罰款。雖然爆粗並唔係犯法，而且好多議員私底下都爆粗，但問題在於身為大律師有專業背景，如果喺公開場合爆粗，咁就麻煩啲喇。
