政情：黃宜弘唔敢「釣魚」
前立法會議員黃宜弘（Philip）日前被指拖欠前司機年假薪金及獎金八十八萬元，案件將於下月開審。佢尋日出席太太、小說作家梁鳳儀喺灣仔會展舉行新書發布會時，仍然笑面迎人，兩公婆輪流招呼好友。以前喺立法會經常「釣魚」嘅Philip，尋日眼都唔眨咁聽太太喺台上分享，交足功課。
現年七十五歲嘅Philip望落精神奕奕，佢話好享受退休生活，以前戴太多頂帽好辛苦，所以離開立法會後，即時放咗六星期大假，陪太太去加拿大溫哥華搵創作靈感，短短四十日內完成二十萬字著作。佢話依家打吓高爾夫球，落雨冇波打就睇書、煲碟同跳社交舞，個人冇壓力反而仲瘦咗，皮帶終於扣到最入嗰格。
稱對前司機好好
講到單官司，Philip明顯有保留，話現階段唔方便透露太多，因為怕影響審訊。不過，佢強調唔會和解，皆因佢覺得「講數賠錢等於認輸」。對於前司機指摘佢「無情無義」，佢就話自己對個前司機已經好好，依家都好擔心對方嘅去向，希望佢快啲搵到工喎。