政情：收禮狂貪曾 寧「漚臭」唔益人
「貪曾」前特首曾蔭權爵士捲入貪腐醜聞令全城共憤，有知情人士陸續爆出貪曾在任時貪小便宜嘅臭史。據聞貪曾在任期間收禮之多，竟然收收埋埋堆滿禮賓府地牢走廊，最驚嚇係收藏一板一板嘅內地著名礦泉水，貪曾寧願自己唔食唔飲，擺喺度「漚臭」都唔益人。知情人士仲爆料，貪曾接收內地禮物有一套慣常機制及方法，交收嘅精密程度，外界人根本無從得知。
本報去年二月獨家揭發貪曾貪盡海陸空，歎盡省港澳，之後到臨近離任時，貪曾又被本報踢爆佢搬走數以十箱嘅紀念版茅台酒到前任特首辦公室存放，惹來私吞公家茅台酒嘅質疑。不過，貪曾「貪蹤」又點只茅台咁簡單，有知情人士爆料，貪曾貪貪埋埋嘅禮物數目真係數之不盡，連出外公幹都疑度縮貪東貪西。
肉骨茶就過期先宴客
據聞貪曾有次到新加坡外訪，佢本人已喺當地歎咗肉骨茶，但當佢返到辦公室，竟然又見到數以十包肉骨茶如影隨形出現，究竟係貪曾自掏腰包買入，定係有人自動送上門就不得而知喇。不過，最絕嘅係佢有好嘢都唔同人分甘同味，肉骨茶一直放咗喺禮賓府地牢走廊原封不動，直至差唔多過期之時，撞啱有次某政黨同佢食飯，佢先攞出嚟宴客，認真係算死草一名。
除咗肉骨茶，貪曾連水都唔放過，據聞佢試過收過內地著名嘅礦泉水，而且仲係用唧車一板一板送嚟，聽落都難以置信。眾所周知，礦泉水值錢極有限，但貪曾收收埋埋咁多礦泉水，都係唔益人，直到過年過節時，先至度縮地分番一、兩支畀人，或搞飲宴時供客人享用。難怪有人事後批評，既然貪曾送水都咁不情不願，有本事就自己一個人飲晒佢喎。
鬼祟派人上皇崗收禮
知情人士仲話，貪曾接收內地禮物有一套慣常機制及方法，一般內地送禮者唔會派專人直接將禮物送到禮賓府，反而係只送到深圳皇崗口岸，然後貪曾再搵人到皇崗接收禮物，咁就神不知，鬼不覺，但就要動用政府資源，認真係勞民傷財。如果貪曾在任時將用喺貪方面嘅精力搞好香港，港人就唔使咁閉翳，新政府亦唔使承擔佢遺下嘅蘇州屎喇！