中環出更：羅啟妍獲邀英學院任講師
位於英國嘅中央聖馬丁藝術與設計學院，係唔少出色設計師嘅搖籃。國際著名珠寶設計師羅啟妍，早排獲該學院邀請出任東西文化首席講師，佢坦言感到好高興，事關佢多年來就東西文化交流上花咗唔少工夫，就連出自佢筆下嘅珠寶設計，都糅合咗東西文化嘅精髓，今次可謂對佢嘅努力給予肯定。
擬帶學生來港 促中西交流
雖然羅啟妍應承該學院出任首席講師，但佢為咗繼續到處推廣及保育中國文化，並唔會駐守院校，但計劃帶當地學生來港交流。近年美國經濟不穩，羅啟妍嘅創作以歐美市場為主，而近期嘅設計定位亦有所調整。佢觀察到好多人對珠寶嘅價值觀改變，由從前愈貴愈好、用作投資及收藏，至今已轉為美化個人面貌嘅大眾化產品，定價已相對降低。
雖然羅啟妍嘅名氣喺珠寶設計界響噹噹，但佢仍四出學習新事物，月前佢以西九文化區Ｍ＋董事局成員，跟隨藝發局到意大利威尼斯出席雙年展，順道去芬蘭參考當地設計，再去俄羅斯聖彼得堡參觀。熱愛敦煌文化嘅羅啟妍話，聖彼得堡建築滲有大量敦煌文化，非去不可喎！
卓妮