「政客靠得住，豬乸會上樹」，呢個道理係人都知，咁如果係過氣政客又點呢？答案係更加靠唔住。原因好簡單，一個曾經做過政客嘅人，必定練到面皮成尺厚，所以只會更加蠱惑、更加貪心、更加無恥。呢，前立法會議員鄭家富就係人辦嘞。
呢位綽號「冚家富」嘅過氣政客，雖然去年年中卸任之後已經唔係立法會議員，但仍長期霸佔立法會兩個車位，到依家仲唔肯放手。最好笑嘅係，佢尋日現身泊車時畀本報記者當場踢爆「超泊」，居然辯稱自己係新民主同盟立法會議員范國威嘅義務法律顧問，又稱「一個議員有六張泊車證」喎。
嗱，姑勿論一個議員有幾多張泊車證，大家只知道立法會停車場有一百二十個車位，主要係為七十名議員及合資格人士行使公務時使用，而且一次只能夠泊一部車，鄭家富早就唔係議員，生人霸死地已經離譜，仲要一人長期霸兩個位，簡直無恥兼無賴。中環金鐘一帶車位矜貴，一個車位閒閒地幾千元月租，鄭家富一人霸兩個位，每月慳番唔少錢，擺明搵納稅人笨，條數點計先？再講喇，曾獲鄭家富力撐參加去年立法會選舉嘅范國威，依家協助鄭家富取得兩張泊車證，咁又算唔算延後利益先？
正所謂，若要人不知，除非己莫為。鄭家富為免超泊事件曝光，竟然使用蠱惑招數，第一招係兩部私家車同時停泊霸住車位，第二招係兩部車更替使用，駕駛其中一部進入立法會停車場，之後轉上另一部離開。佢以為咁就可以瞞天過海，點知最後仍被逮個正着。
講起呢位過氣政客，真係醜聞多籮籮。佢先後擔任立法會交通事務委員會副主席及主席，本身又係執業律師，但曾被揭知法犯法，超速駕駛無交罰款，又缺席聆訊，搞到要向市民道歉，最後以書面認罪並罰款了事。
所以話，江山易改，本性難移。鄭家富做政客嘅時候不務正業，一味抽水，依家唔做政客，一樣貪得無厭。佢退出政壇後做證婚公司，可以講係豬籠入水，早前七一大遊行佢仲乘機抽水，為參與遊行者提供九折證婚服務，大發遊行財，被譏為另類「蛇齋餅糉」。睇佢依家咁風光，照計租得起車位有餘，點解仲要霸佔立法會車位呢？唯一解釋就係貪婪。正如嗰位淘古井嘅陳振聰咁，得到小甜甜三十億元仲嫌唔夠，仲想霸佔小甜甜幾百億身家，連法官都睇唔過眼，直斥佢極度貪婪，無恥邪惡，卒之落得可恥下場。呢啲咪就係貪字得個貧囉。
講開又講吖，堂堂立法會停車場居然好似無掩雞籠咁，隨便畀人超泊，簡直成何體統。沒有規矩，不成方圓，當局再唔嚴明紀律，收緊使用權，立法會停車場隨時變成垃圾場嘅咋！