一間知名西班牙服裝品牌連鎖店近日進行清貨大減價，吸引唔少人乘機去執平貨。立法會議員陳恒鑌（Ben）同謝偉俊（Paul）原來都係該品牌嘅捧場客，尋日仲不約而同着上同款但唔同色嘅西裝褸，好似孖生兄弟咁撞衫撞到應一應。
雖然兩人身形差唔多，但驟眼睇似乎阿Paul着得比較好睇，相反阿Ben件褸就好似有啲緊身。阿Ben話，件褸係由太太購入，自己事前對此毫不知情，又話阿Paul向來對衣着打扮甚有心得，同對方着埋同一款褸，證明自己都好有taste喎！
