為咗擴展流動電話網絡覆蓋範圍，唔少電訊服務營辦商都會增加安裝電訊發射器。有立法會議員就此提出質詢，話電訊商喺遊樂場同公園安裝發射器，搞到居民擔心受輻射影響，連運動都唔敢做。議員鍾樹根就建議政府不如喺裝有發射器嘅公園、遊樂場標示輻射強度同影響範圍，等公眾可以有知情權咁話。
話說有市民投訴呢啲發射器只係同長者、小朋友嘅活動範圍相距十米，居民都好擔心長期暴露喺發射器釋出嘅輻射中會令健康受損，所以樹根就建議喺適當地方標示輻射強度同影響範圍。商務及經濟發展局局長蘇錦樑就話，電訊商喺政府物業裝呢啲發射器要向政府部門申請，之後亦要做相關測試，而佢哋採用嘅指標亦符合國際標準。
其實一般市民大眾唔係研究輻射嘅專家，亦都未必清楚有關國際標準，就算喺公園豎立告示牌，小朋友同長者都未必識睇。其實呢個問題已經爭拗多年，商業大廈安裝發射器就話好難規管，但公園休憩用地，當局係咪都非批准不可呢？