政情：高佬賢「四大花膠」鎮場
漁農界立法會議員何俊賢（高佬賢），雖然對當造農產品同海產情有獨鍾，甚至會周圍捐窿捐罅食好嘢，但估唔到佢家中收藏大量海味之餘，仲將四塊歷史悠久嘅大花膠帶埋入立法會辦公室，有時仲會將佢哋擺近玻璃曬太陽，保持乾爽。花膠由大海魚魚鰾曬乾而成，含豐富膠原蛋白，係貴價海味之一。高佬賢喺立法會擺放花膠，唔通佢諗住肚餓時可以用來醫肚？
立會水劫驚浸濕
高佬賢解釋，呢幾塊大花膠有成幾十年歷史，當中好似佢個頭咁大嘅「鰲膠」更加同佢年紀一樣咁大，都係由何媽媽喺佢出世當年購入，陪住佢一齊長大成人，根本就唔捨得食咗佢哋。如今高佬賢進身立法會議員，佢就順理成章攞咗幾塊大花膠擺喺立法會，好似啲公司開張大吉時例必有幾塊「鎮店之寶」咁。
佢仲話，立法會對上兩個月先後遭逢火災同水劫，初時佢都以為自己間房啲嘢會畀啲水浸濕晒，所以當佢返辦公室收拾殘局時，第一件事就係要檢查花膠有無被浸濕，因為花膠一浸濕咗就會變味，反而啲電子產品買晒保險就唔使驚喎。