政情：拍打通經脈 大輝唔怕瘀
現代人追求健康嘅方法層出不窮，近年就興起一種「拍打拉筋療法」，連立法會議員林大輝都跟住學。佢喺議員每月通訊中自爆，近日同太太雙雙迷上「拍打」，拍到自己周身瘀痕，着短衫短褲去踢波時更嚇親波友，以為佢畀對手撞傷，紛紛勸佢唔好咁搏命喎。
「奇妙系列」增三駒
大輝話，佢多位好友接觸呢種療法後，都大讚簡單易做，功效顯著，改善都市人腰痠背痛嘅文明病，令佢同太太都好感興趣。後來佢哋參加咗一個相關講座，聽專家蕭宏慈講解「拍打拉筋」嘅好處。據講拍打身體可以產生大量幹細胞，改善內分泌、打通全身經脈；而拉筋就有助氣血流暢，延年益壽，據聞有「筋長一吋，長命十年」之效。
本身係馬主嘅大輝又話，早前幸運地喺馬會抽到三匹自購新馬名額，但卻為改馬名而頭痛。佢話，過往佢以「奇妙」及「繼續」兩系列命名愛駒，但以「奇妙系列」勝出較多賽事，似乎都幾旺佢，最後佢分別將三匹新馬命名為「超奇妙」、「勁奇妙」及「爆奇妙」，希望場場Win咁話。