政情：貪曾媚富阻收高球場
政府寧願花費三百億元向新界東北居民收地，都唔敢收回一百七十公頃大嘅粉嶺高爾夫球場，令今次「高場」與雞蛋之爭，好可能變成另一次菜園村風波翻版。有政府中人爆料，其實民政事務局局長曾德成喺上屆政府已經諗住收回高球場，奈何當年係「貪曾」前特首曾蔭權爵士主政時為咗討好班富豪而刻意阻撓收地，加上德成局長一直懶理檢討「私人遊樂場地契約」，以致數十幅政府用地淪為「私人俱樂部」。
德成局長喺今次粉嶺高球場風波中未出過聲，撰文都欠奉，完全唔似佢作風，外界普遍批評佢驚咗班富豪，而不理普羅大眾死活，有人仲插佢唔做嘢添。不過，近日有政府中人放風，聲稱德成局長今次係硬食死貓，其實局長都想收回高球場好耐。據聞德成局長喺上屆政府曾經向貪曾提出要檢視「私人遊樂場地契約」，尤其係粉嶺高爾夫球會，因為塊地面積最大，最易引起民怨，建議唔好再賤價租出去。
可惜貪曾性格向來剛愎自用，而且同班富豪為伍，因而惹來「官商勾結」嘅惡名，身邊好多老友都持有高爾夫球會會籍，貪曾為維護佢哋利益，所以就下令德成局長咪搞咁多嘢。
民政唔敢出聲 發展局做醜人
大家可能會問，點解新特首上場後，德成局長仍繼續闊佬懶理唔做嘢？據講係因為民政局政策原則，主動收回高球場會遭高球界人士質疑，點解當局唔向其他體育運動開刀？所以民政局要靠發展局出聲做醜人，以公眾利益為由要求收地。
不過，話說回來，粉嶺高球場只係政府用地變「私人俱樂部」嘅冰山一角，其實仲有數以十幅土地以象徵式地價及豁免地價批予私人機構或團體組織作會所或俱樂部之用，過去兩屆立法會都先後有議員要求當局檢討「私人遊樂場地契約」，係咪繼續容許部分土地只提供畀一小撮人享用，可惜當局卻辯稱批出嘅土地係過去幾十年沿襲下來，又辯稱會開放畀公眾使用云云。所以奉勸德成局長咪再姓賴，不如手起刀落做番場好戲先至係出路。